CATMON, Cebu| Dakong garbo ug kalipay ang gibati sa katawhan sa Lungsod sa Catmon human gihatagan og dakong pagdayeg ug pag-ila ang Municipal Disaster Risk Reduction and Management Office (MDRRMO) Catmon tungod sa ilang aktibong partisipasyon sa LDRRMCO Regional Level, ug sa ilang ligdong nga serbisyo, walay hunong nga dedikasyon, sakripisyo, ug talagsaong mga kalampusan sa pagpalig-on sa lokal ug rehiyonal nga kaandam batok sa kalamidad.
Kini nga pasidungog usa ka pamatuod nga ang paningkamot sa matag miyembro sa MDRRMO Catmon dili kawang, kundili nagahatag og tinuod nga kausaban ug kasiguruhan sa kinabuhi sa matag Catmonanon.
Gipasalamatan usab ang tanang responders ug volunteers nga walay kapoy nga nag-alagad sa komunidad, ilabina sa panahon sa kalamidad ug emerhensiya. Ang inyong kaisog, pagkahiusa, ug tinuod nga pag-alagad mao ang pundasyon sa kalig-on sa atong lungsod.
Dako usab ang pasidungog kang Mayor Avis Ginoo Monleon ug sa SB Officials sa ilang padayon nga suporta sa mga programa sa disaster preparedness ug community resilience. Tungod sa ilang liderato ug malinawong panan-aw, mas napalig-on ang atong kahandam ug kaluwasan.
Usa ka dakong pasalamat ang gipadayag sa Office of Civil Defense Region VII (OCD 7) alang niining award nga nagpasabot sa rehiyonal nga pag-ila sa paningkamot ug dedikasyon sa MDRRMO Catmon.
Kini nga award nagpakita nga ang Lungsod sa Catmon padayon nga nagahimo og mga konkretong lakang aron mapalig-on ang kaluwasan, kaandam, ug kalig-on sa komunidad batok sa tanang matang sa katalagman. Kini usab usa ka pahinumdom nga pinaagi sa panaghiusa, disiplina, ug kooperasyon, walay kalamidad nga dili nato maatubang.
Sa maong kalihukan mitambong si Mayor Avis ug ang pangulo sa MDRRMO nga si Glen Villas.
Congratulations MDRRMO Catmon, tanang Responders ug Volunteers, Mayor Avis Ginoo Monleon, ug SB Officials!
Padayon sa serbisyong tinuod, matinud-anon, ug makiangayon. Padayon ta sa pag-alagad uban ang kasingkasing, kaisog, ug paglaum , alang sa mas luwas, mas lig-on, ug mas malinawon nga Catmon.
Source: Ang Lungsod sa Catmon Karon
